AsturiesNR

MADRID, 27 de Marzu (OTR/PRESS)
La población europea avieyó de golpe unos 400.000 años. Esti cambiu de sutrucu débese al últimu y imporante atopamientu na sierra burgalesa d’Atapuerca, onde se llocalizó una mandíbula con dientes d’un aparente ‘Homo Antecessor’, que se paseó pela Península Ibérica hai 1,2 millones d’años. La noticia ta na portada de la prestixosa revista científica ‘Nature’ y abre la puerta a la llocalización de nuevos fósiles qu’averen más nel tiempu la vida conocida n’África y Europa.

La revista norteamericana da per segunda vez la portada al equipu d’Atapuerca gracies a esti últimu descubrimientu na Sima del Elefante, frutu del trabayu nesti patrimoniu de la Humanidá del equipu comandáu por Juan Luis Arsuaga, José María Bermúdez y Eudald Carbonell. L’atopamientu en xunu del añu pasáu de la parte anterior d’una mandíbula con dientes “fai dar marcha atrás na estimación de la llegada del home al vieyu continente”, señaló Arsuaga, en declaraciones a RNE recoyíes por otr/press. Provisionalmente, la “propiedá” de los restos atribuyóse al ‘Homo Antecessor’ y a xulgar pol tamañu de la mandíbula pue corresponder a una muyer.

Los restos más antiguos que fueron llocalizaos hasta la fecha datárense 800.000 años atrás, anque l’homínidu más vieyu conocíu hasta agora fuera de territoriu africanu fuera atopáu na ex república soviética de Xeorxa y pue tener 1,7 millones d’años. Agora queda por saber hata qué puntu la historia va dar p’atrás al primer européu, ya que se llocalizaron restos anteriores de ferramientes de piedra en Francia, Italia y España, según l’antropólogu del Muséu d’Historia Natural de Londres Chris Stringer. “Faltábamos la evidencia directa y ya la tenemos”, aplaudió Bermúdez, recalcando la relevancia estos restos humanos.